Mokabat na sa P6.83 billion ang kantidad sa kadaot nga gibilin sa bagyong Kristine sa sektor sa pagpanguma.
Kini ang subay sa updated nga report sa Department of Agriculture – Disaster Risk Reduction and Management Operations Center (DRRMO).
Miasaka usab sa 171,080 ang ihap sa mga mag-uuma ug mananagat nga naapektuhan sa pag-igo sa nasampit nga bagyo gikan sa 143,000, duha ka adlaw na ang nakalabay.
Mibaot na usab sa 317,316 metriko tonelada ang natumbok nga production loss gikan sa 141,971 ektarya sa mga kaumahan ang naapektuhan.
Nagpabilin pa gihapon nga labing apektado ang rice industry nga nakaangkon ug kinatibuk-an nga P5.05 billion nga kadaot samtang ang nahibilin nga gibahin sa mga industriya sa mais, fisheries, poultry, ug uban pa.
Sa kasamtangan, wala pa’y datos kabahin sa kadaot nga gibilin ni Super Typhoon Leon sa sektor sa panguma.
