Giawhag karun sa usa ka representante gikan sa progresibong pundok nga Bagong Alyansang Makabayan (Bayan) ug Senotorial Candidate nga si Teodoro “Teddy” Casiño nga dili undangan nga tutokan sa mga magbabalaod ang pag-imbestiga sa confidential funds sa Office of the Vice President ug sa Department of Education, inay nga magpatandog kini sa mga patutsada ni Vice President Sara Duterte nga mao ang paghagit niini ngadto sa mga magbabalaod nga mupailawom og drug test.
Gibatikos sab ni Casiño ang matud pa diversionary tactics nga ginabuhat ni Duterte aron nga makalikay sa mga kritikal nga mga isyu susama sa dili hustong paggamit sa mga pundo sa gobyerno.
Saysay pa niini nga usa ka paglikay matud pa sa tinuod nga isyo ang ginabuhat sa Bise Presidente gumikan wala matud pa kini nagatubag og direkta labot sa mga isyu nga ginaatubang.
Giklaro sab ni Casiño nga kinahanglan matud pa nga mahatagan og pagtagad ug kasolbaran ang tanang mga alegasyon ngadto kang VP Sara pinaagi sa pagtuki ug pagpangutana og paunsa kini gigamit ang pundo sa gobyerno, diin dako matud pa ang ilahang pagtuo nga nagamit kini sa laing butang ug wala nahasubay sa angay nga proyekto nga gikatakdang itagana.
Dugang pa nga ha-om matud pa sa impeachment ang gikalambigitan ni Duterte nga mga isyu labot sa dili paghatag og saktong tubag sa mga isyu nga adunay kalabutan sa confidential funds.
Subay na usab sa hagit ni Duterte, miresulta kini ngadto sa ubang mga magbabalaod lakip na ang mga representate gikan sa iyahang kapartido nga mipailawom sa maong drug-tests, diin sumala pa ni Casiño nagahatag lamang og pamaagi ang Bise Presidente nga mahimong komplikado ang maong isyu og dili na mahisgutan.
