Gibutyag ni former Vice President Leni Robredo nga gi-abi-abi niya og gikumusta si President Ferdinand Marcos, Jr. dihang miabot kini sa Sorsogon City sa bag-uhay lamang tungod ginatahod niya ang posisyon niini.
Pahayag pa sa kanhi Bise Presidente, dihang gihagad siya ni Senate President Chiz Escudero nga maghulat kang Marcos, wala gyud siya nagduha-duha tungod bisita nila kini sa Bicol region.
”Sa akin kasi hindi naman isyu ‘yun, in fact para sa akin ‘yung nagbibigay respeto ka sa posisyon, so wala namang… walang pagaatubili ‘yung pag-oo ko kay Senator Chiz kung puwedeng sumama ko sa kanyang pagsalubong,” sumala kang Robredo.
”Tingin ko tama lang naman kasi bisita natin sa Bicol Region, ‘yun na nga ang problema nga di ako naka-stay nang matagal kasi may hinahabol ako,” dugang sa kanhi Bise Presidente.
Nahitabo kini sa inagurasyon sa Sorsogon Sports Arena sa milabay nga Martes kun asa personal nga nagtambong si Marcos.
Usa si Robredo sa kanhi og current government officials nga nagtindog, naghulat, og nagtamyaw kang Marcos dihang nagsulod kini sa arena sa Barangay Balogo, Sorsogon City sa alas 10:00 sa buntag.
Una usab nga nagpasalamat si Marcos kang Escudero sa iyang gihimo nga makaangkon sila ni Robredo og bisan gamay lamang nga pagkitaay.
Wala usab nakatinir si Robredo sa programa sa Sorsogon tungod adunay naka-schedule kini nga adtoan sa Naga.
Ginakonsidera kini sa uban nga lakang sa “political reconciliation”.
Kaniadtong 2022, mikandidato si Marcos ilawom sa ticket nga UNITEAM kauban si Vice President Sara Duterte.
Kahinumduman nga si VP Sara ang nagbisita usab mismo sa balay ni Robredo niadtong Peñafrancia Festival sa milabay nga Septyembre, apan gibutyag ni Leni nga “personal” og dili “political” ang ilang mga naistoryahan.
