Giimbita sa Quad Committee si Alice Guo, Cassandra li Ong ug Atty. Harry Roque sa sunod nga pagdungog sa Huwebes kung asa ang ikaunom nga pagdungog sa Quad Committee ang motutok sa operasyon sa mga illegal pogo hubs.
Matod ni Barbers nga ang Quad Comm nagsulat sa RTC Branch 282 sa Valenzuela City nga adunay hurisdiksyon sa kaso ni Guo o Guo Hua Ping nga tugutan nga makatambong sa husay sa Huwebes.
Sa laing bahin, si Ong anaa sa kustodiya sa Kamara ug kasamtangang gitanggong sa detention facility sa Kamara.
Gipangita pa sa mga otoridad si Roque human ang Quad Comm mimando sa pagdakop kaniya tungod sa kapakyas sa pagsumite sa gikinahanglang mga dokumento aron pagmatuod nga wala siyay koneksyon sa operasyon sa mga illegal pogo hubs.
Gihangyo sa Quad Comm ang Bureau of Immigration nga mag-isyu og hold departure order batok kang Rpque tungod kay gikonsiderar siya nga pugante o wanted sa balaod. Samtang, giklaro ni Barbers, nagpabilin ang ilang imbitasyon kang kanhi Presidente Rodrigo Duterte nga moatubang sa Quad Comm hearing tungod sa pagkalambigit niini dili lang sa pogo kon dili sa extra judicial killings.
