Respetuhon sa House quad committee (Quadcom) ang desisyon ni kanhi Presidente Rodrigo Duterte nga dili mutambong sa nagpadayong hearing sa sa extra judicial killings, illegal drugs trade, ug sa Philippine Offshore Gaming Operator (POGO).
Matud ni Committee Chair Cong. Ace Barbers, kon mutambong ang kanhi presidente, hatagan siya sa komitiba og respeto nga angay kaniya isip kanhi pangulo sa nasud, apan kay moinsister man siya nga dili kini gustong mutambong, respetuhon sa komite ang maong desisyon.
Dugang pa nga niya nga isipon usab sa komite nga usa ka dakong dungog kon motambong ang kanhi presidente.
Gipasalig usab sa kongresista nga dili gayud nila hisgutan ang kanhi presidente nga contempt agi’g respeto sa iyang kanhing posisyon.
Unang giimbitar ang kanhi presidente sa pagtambong sa series sa Quadcom hearings tungod kay nalambigit ang iyang pangalan sa giingong sunodsunod nga pagpamatay nga nahitabo atol sa drug war.
Partikular, ang pagpatay sa tulo ka Chinese drug lords sulod sa Davao Prison and Penal Farm sa Davao Del Norte.
Kon gani muabot sa punto nga mosuwat og committee report ug mohimo og rekomendasyon ang komite, posibleng daghang pangalan ang maapil sa maong report, ingon man nga ang maong report magbasi lang sa bisan unsang testimonya ug ebidensiya nga mahipos sa komite.
Matud sa magbabalaod, ipahibalo sa komite ang resulta sa imbestigasyon sa mga ahensya sa gobyerno ug korte alang sa mas lawom nga imbestigasyon.
