Gihatagan ug katin-awan sa Philippine National Police nga nisurender ang lider sa Kingdom of Jesus Christ (KOJC) nga si Apollo Quiboloy human gihatagan og ultimatum nga motugyan sa iyang kaugalingon sulod sa 24 oras.
Sa usa ka hamubo nga press conference sa Camp Crame, diin gidala ang pugante nga pastor, nagbuyag ang tigpamaba sa PNP nga si Police Colonel Jean Fajardo nga ang kapulisan mihatag kaniya og ultimatum nga mo-surrender sulod sa maong oras, gumikan kon dili, sudlon pag usab sa mga awtoridad ang KOJC compound sa Davao City.
Human niini, nagsugod ang negosasyon ala 1:30 sa hapon kagahapon, Domingo.
Sa kaulahian, nasayran nga nisurender si Quiboloy sa Intelligence Service of the Armed Forces of the Philippines (ISAFP).
Gipailalom sa booking procedure sa Camp Crame, Quezon City ang pasttor, kauban ang ubang mga akusado nga sila si Jackielyn Roy, Ingrid Canada, Cresente Canada, ug Sylvia Cemañes.
Kini nga proseso naglakip sa fingerprinting, mug shots, ug blood pressure checks, uban sa pipila niini nagpakita sa taas nga lebel sa presyon sa dugo.
Matod ni PNP Spokesperson Col Jean Fajardo, ang grupo niabot sa Camp Crame mga alas 5:30 sa hapon, gikan sa Davao City paingon sa Villamor Air Base sakay sa C-130 military plane, ug nakaabot sa Custodial Facility mga alas 9:10 sa gabii.
Ang pagsurender subay matud pa sa negosasyon sa Philippine National Police (PNP) ug Armed Forces of the Philippines (AFP).
Usa ka malinawon nga negosasyon, nga gipasiugdahan sa PNP Intelligence Group ug ISAFP, nga nisangpot sa malampusong pagsurender ni Quiboloy ug sa uban pa.
Matod ni Fajardo nga pagabasahon ngadto sa mga akusado ang tanan sa ilang mga kaso uban sa ilang mga legal counsel nga anaa.
Partikular ang tulo ka mga kaso nga naglambigit sa child abuse, sexual abuse, ug qualified trafficking.
Sa pikas bahin, gipaklaro sa kampo ni pastor Apollo Quiboloy nga misurender ang nahisgutan kang Major General Edmundo Peralta, commander sa Intelligence Service of the Armed Forces of the Philippines (ISAFP) , Setyembre 08, 2024.
Sa usa ka phone interview, gibutyag sa usa ka army intelligence official nga pagadag-on si Quiboloy sa ISAFP headquarter sa Camp Emillio Aguinaldo sa Quezon city.
Sa pikas bahin, wala pa maghatag ug komento ang AFP kabahin sa pagsurender ni Quiboloy apan gipasalig nga nakasuporta sa PNP.
Kahibaloan nga unang gianunsiyo ni DILG Secretary Benhur Abalos pinaagi sa usa ka online post nga naaresto na si Quiboloy.
Kining butanga, maoy nakaaghat sa mga komento gumikan managlahi ang buot ipasabot sa pulong nga “naaresto” ug “misurender”.
Sa karun, padayon pa ang pagpanubay sa kompirmasyon niining butanga.
Sa bahin usab ni Police Regional Office-Davao Director Brig. Gen. Nicolas Torre III, makatulog na matud pa ug maayo ang mga kapulisan tungod tulo ka oras lang ang ilang tulog sa 16-ka adlaw sa ilang operasyon nga pangitaon si Quiboloy.
Naglaom usab kini nga masig-uli ang relasyon sa mga church members ug makaamgo nga gibuhat lang sa mga kapulisan ang ilang trabaho.
