Nakabalik na sa nasod si dismissed Bamban, Tarlac Mayor Alice Guo human kini madakpi sa Indonesia. Kauban niya silang Interior Sec. Benhur Abalos ug Philippine National Police Chief Rommel Marbil sa paghidangat sa nasud ala 1:10 sa kaadlawon, Biyernes, Setyembre 06, 2024 diin gamit ang pribadong eroplano.
Una nang gitakda ang pagbalik kagahapon, apan nalangan tungod sa pipila ka proseso tali sa Pilipinas ug Indonesia.
Kahinumduman nga niadtong Mayo 22, 2024, katapusang nakit-an sa Pilipinas ang kanhi mayor dihang miatubang kini sa Senado kalabot sa imbestigasyon sa iyang posibleng kalambigitan sa POGO operations.
Sa unang semana sa Hulyo, gisuspende siya sa pagka mayor.
Human niini, milayas si Guo uban nila ni Wesley Guo, Shiela Guo ug Casandra Ong.
Hulyo 18, 2024, dihang ang grupo niini gikaingong nakasulod na sa Kuala Lumpur, Malaysia.
Hulyo 21, 2024, misakay sa usa ka flight paingon sa Singapore, diin nagpabilin siya sa maong lugar sulod sa halos usa ka bulan.
Agosto 18, 2024 sa dihang mibiya sila sa Singapore ug mipaingon sa Batam, Indonesia.
Agosto 19, 2024, gipahibalo ni Sen. Risa Hontiveros nga nakakuha siya og impormasyon nga nibiya na sa nasud ang kanhi mayor.
Agosto 20, 2024, gidakop sa Batam, Indonesa si Shiela ug Casandra nga unang gi-turn over sa mga otoridad sa Pilipinas.
Niining milabayng Septiyembre 3, 2024, nadakpan usab sa mga awtoridad sa Indonesia si Alice sa usa ka villa sa Greater Jakarta.
