Nagdepensa ang Bureau of Immigration nga nakagawas na sa nasud ang gitaktak nga mayor sa Bamban, Tarlac nga si Alice Guo apan wala kini moagi sa mga awtoridad sa imigrasyon sa Pilipinas.
Sumala kang Immigration Commissioner Norman Tansingco, nga nakadawat og impormasyon ang ahensiya nga ilegal nga nibiyahe si Guo sa Malaysia kaniadtong Hulyo.
Nagbiyahe usab kini paingon sa Singapore kauban sila si Sheila Guo ug Wesley Guo.
Gipasabot ni Tansingco nga samtang ang pangalan ni Guo nalista sa immigration lookout bulletin (ILBO) sa Department of Justice, ang pagbiya niini wala matala sa sistema ug centralized database sa BI.
Gipaklaro usab niini nga ang BI adunay monitor sa tanan nga regular international airport sa pagsulod ug paggawas sa nasud sa mga gabiyahe, apan ang mga dili pormal nga exit point gidumala ug gibantayan sa ubang mga ahensya sa aviation o maritime.
Kahibaloan nga gibutyag ni Senador Risa Hontiveros sa iyang giluwatan nga impormasyon nga si Guo, kinsa giila usab sa Chinese national identity niini nga si Guo Hua Ping, nakabiya na sa nasud niadtong Hulyo 18.
