Miapela ang Davao police sa mga miyembro sa Kingdom of Jesus Christ (KOJC) nga dili mubabag ug tugutan ang awtoridad nga magpahigayon ug search operation kang Pastor Apollo Quiboloy.
Naglaum si Police Regional Office 11 (PRO 11) public information office chief Police Major Catherine dela Rey nga sa mas dali nga panahon mapatuman na ang arrest warrant kang Quiboloy nga walay pagbabag sa mga suporter niini.
Una nga gikataho nga gipaklaro sa KOJC nga ilang bantayan ug babagan kung ipatuman ang bag-ong warrant of arrest sa Philippine National Police (PNP) batuk sa Pastor sulod sa ilang compound.
Kahinumduman nga nakasinate ug kagubot tali sa PNP Criminal Investigation and Detection Group (CIG) ug mga suporter ni Quiboloy kaniadtong Hunyo 10 dihang gisulayan nga ipatuman ang warrant of arrest batuk kang Quiboloy.
Rason sa mga miyembro sa KOJC nga gituyo aron hadlokon ug pugson si Quiboloy aron musurender.
Gibarugan usab sa kapulisan nga dili tumong nga madaut o madamay ang mga sibilyan tungod gisunod lamang ang mando sa korte.
