Narekober sa otoridad sa resort sa Pampanga ang pipila ka mga resibo ug dokumento gikan sa kompaniya ug incorporators nga naglambigit kang Bamban, Tarlac Mayor Alice Guo.
Kini human giablihan sa otoridad ang 19 ka money vaults sa sulod sa villas sa Fontana Leisure Parks sa Clark Freeport.
Ang villas ang giarkilahan sa mga ginakonsidera nga “big bosses” sa gi-raid nga Zun Yuan Technology POGO facility sa Bamban ug sa business partners sa suspended mayor.
Sa maong vaults anaa ang mga bank documents sa Baofu Land Development, ang firm nga ginaalegar nga konektado kang Guo ug tag-iya sa yuta kun asa nahimutang ang gi-raid nga POGO hub sa Bamban.
Sumala ni Gilbert Cruz, Presidential Anti-Organized Crime Commission (PAOCC) executive director, narekober usab ang mga dokumento sa Chinese fugitive nga si Huang Zhiyang, nga business partner ni Guo.
Pipila sa mga dokumento mao ang duha ka Taiwanese passports ni Huang, photocopy sa uban niya nga passports gikan sa uban nga nasod ug usa ka special retiree’s visa.
Sumala sa Presidential Anti-Organized Crime Commission, si Huang ang gawas-sulod sa Pilipinas gikan kaniadtong 2012.
Ginatan-aw usab sa mga otoridad ang pandemic travel pass nga gi-isyu kang Huang ni kanhi Bamban Mayor Antonio Feliciano.
Nakuha usab sa villas ang mga dokumento sa uban nga Baofu incorporators nga silang Zhang Rujin ug Lin Baoying, nga nalambigit sa money laundering case sa Singapore.
