Gibuhian na sa Senado si kanhi Philippine Drug Enforcement Agency (PDEA) agent Jonathan Morales ug kanhi Napolcom employee nga si Eric Pikoy Santiago, human kini gitanggong sa contempt tungod sa pagpamakak sa Senate hearing.
Matod ni Senate President Chiz Escudero, gipatawag siya ni Senate President pro tempore Jinggoy Estrada aron pahibaw-on nga iyang gibuhian si Morales.
Kahinumduman nga si Estrada mihimo sa mosyon nga i-cite ang kanhi ahente sa PDEA isip contempt sa wala pagsulti sa tinuod.
Samtang, matod ni Escudero, si Senador Ronald “Bato” Dela Rosa ang nanawag kaniya aron sultihan nga buhian si Eric Santiago.
Si Dela Rosa maoy mipapriso kang Santiago human niya gibutyag sa komite nga ang tanan niyang gisulti sa maong video hinimo lang o tinumo-tumo aron makaabot ug makasulti sa imbestigasyon sa Senado.
Matod sa Senate President, sa wala pa buhii ang duha, nangumusta siya sa detention room kay naatol nga gibisita niya ang tanang opisina sa Senado lakip na ang opisina sa Sergeant at arms ug security sa Senado diin gitanggong ang duha.
