GENERAL SANTOS CITY – Pabor si Former Sarangani Governor ug kasamtangang Chairman sa Chamber of Commerce-Gensan, Miguel Rene Dominguez sa Charter Change kon Cha-Cha. Atol sa meet and greet sa mga board of directors sa Gensan Chamber of Commerce, iyang gibutyag nga ang konstitusyon sa nasud gimugna kaniadto pang 1987 ug aduna nay daghang mga probisyon nga gikinahanglan na gyud nga usbon aron nga mas mahimong competitive ang nasud sa ubang kanasuran hilabina sa hisgutanan sa ekonomiya.
Aron mas mulambo pa ang nasud, kinahanglan niining musabay sa ubang kanasuran ug aron nga kini maangkon, kinahanglang usbon ang pipila ka mga probisyon sa batakang balaod ug pulihan ug mga balaod nga haum sa kasamtangang panahon.
Sa karon, ang Pilipinas naiwit na sa daghang mga nasud sa South East Asia kung hisgutan ang investment.
Ang populasyon sa nasud taas apan walay trabahong kasudlan mao nga daghan ang nagkalisod.
Sumala pa niini mahinongdanon ang investment tungod kung daghang magbubo og puhunan, daghan usab ang mamugnang trabaho ug kung daghan ang trabaho, mulambo ang kinabuhi sa katawhang Pilipino.
Hinuon, nasabtan sa kanhing gobernador sa Sarangani nga daghan ang mga nagduda sa tumong sa Cha-cha hilabina ang gikaingong basin ug himuon kining pamaagi sa mga pulitiko aron lugwayan o tas-an ang termino apan sumala niini nga dili kini angayang himuong rason aron nga pugngan ang paglambo sa nasud.
