GENERAL SANTOS CITY – Gibutyag ni Engr. Ronald Nuñeza, labaw sa City Housing and Land Management Office, nga adunay 558 ka mga bag-ong nitso sa Antonio C. Acharon Memorial Park nga gigahinan ug 6,000,000 pesos sa lokal nga panggamhanan. Matod sa opisyal, halos katunga na ang naokupar niini.
Apan, dili angay ikaguol tungod anaa silay ginalauman karon nga mukapin 700 ka mga bag-ong nitso nga adunay 10,000,000 pesos nga budget ug ginahulat na lamang kini nga aprubahan sa Sangguniang Panlungsod aron ipailawom na sa bidding.
Dugang pa ni Engr. Nuñeza, dako usab nga tabang sa lokal nga panggamhanan ning dakbayan kung mubayad ang may mga obligasyon sa Antonio C. Acharon Memorial Park.
Iyang gihatagan ug gibug-aton ang kontribusyon niini sa kinatibuk-ang revenue kon koleksyon sa lokal nga panggamhanan kung asa magagikan ang mga pondo sa nagkadaiyang programa sa gobyerno ning siyudad.
Alang sa mga gusto mubayad sa ilang pinansyal nga obligasyon sa pampublikong sementeryo, abli ang ilang buhatan nga nahimutang sulod sa City Hall ug muhatag sila ug order of payment form sa katawhan aron ma-proseso kini sa buhatan sa City Treasurer’s Office.
