GENERAL SANTOS CITY – Padayun ang gipahigayung imbestigasyon sa Lagao Police Station kabahin sa pagpanunggab sa usa ka motorista dungan ang pagkawat sa motor niini.
Giila ang biktima Danilo Canaliso, 56 anyos nga driver ug residente sa Bawing, Barangay Siguel ning dakbayan.
Sa initial report sa Lagao Police Station, aduna matud pa kini gihatud nga pasahero gikan sa Brgy. Lagao padulong sa Purok 1, Barangay Ligaya.
Pabalik na unta kini sa terminal apan miduol ang 2 ka wala maihing lalaki ug gipahunong.
Usa sa mga suspek ang kalit midunggab sa kilid nga bahin sa biktima ug pugsanong gikuha ang motorsiklo niini.
Paspas nga nakasibat ang suspek gamit ang motor samtang ang biktima ang nakapangayu pa ug tabang hinungdan dali kini nadala sa balay tambalanan.
Gipakatag dayun sa kapulisan ang impormasyon kabahin sa motornapping ug gipa-alarma ang tanang police station.
Nangalap pa og dugang impormasyon ang kapulisan aron mailhan og masikop ang mga suspek.
