GENERAL SANTOS CITY – Preparado na ang kapulisan alang sa pagsalog sa Kalag-Kalag.
Sa gipahigayong press conference, gibutyag ni Police Col. Jomar Alexis Yap, Acting GenSan Ciy PNP Director, mukabat sa 992 ka mga pulis ang ipakatag sa nagkadaiyang mga sementeryo dinhi sa dakbayan.
Kaabag sa kapulisan sa pagpatuman sa seguridad og pagbantay ang Joint Task Force, mga force multipliers og may OJT usab nga mga Criminology students samtang may ipakatag nga intel officers sa palibot.
Gibutyag ni Col. Yap, sa Uktobre 30 pa lang ideploy na ang kapulisan nga ipakatag upat ka public cemetery og unom ka pribadong sam-ang nga gilaumang dagsaon sa katawhan.
Magpabilin ang kapulisan sa pagbantay sa seguridad sa Nov. 3. Gawas sa napulo ka sementeryo, magbutang usab ang GSCPO og mga pulis sa mga pampublikong lugar sama sa terminal , resort, mga malls , simbahan og uban pa.
Nanawagan si Col. Yap sa katawhan nga sundon ang mga patakaran nga ipatuman lakip niini ang pagsunod sa mga mimimum health protocols, ginadili ang pagdala og pack bag, pagsuot og kalo , pagpasulod sa sam-ang sa mga hinagiban, ilimnong makahubog, baraha og sigarilyo.
Nanawagan usab sa katawhan nga kung mahimo, karon pa lamang muduaw na sa ilang mga minatay o kung sa Nov 1 o Nov 2 mubisita sa sementeryo, mas maayong magsayo aron maabtan sa bagang -duot sa trapiko.
