GENERAL SANTOS CITY – Gitutukan karon sa General Santos City Police Office (GSCPO) ang mga anggulo sa motibo sa pagpamusil kagahapon sa usa ka contractor sa Barangay San Isidro ning syudad.
Apan gitan-aw sa kapulisan nga negosyo ug personal grudge ang motibo sa pagpamusil.
Kahibaluan nga suwerte nga naka-ikyas ang biktima nga giila sa pangalan nga si si Danilo Igual Uy, 53 anyos,residente sa Colinas Verde Brgy. Lagao sa maong pagsuway sa iyahang kinabuhi kini human nga wala maigo dihang gipusil sa riding-in-tandem suspects.
Base sa impormasyon, ang biktima sakay sa iyang sports utility vehicle dihang gipusil sa mga suspects nga sakay sa wave 125 kulay itum sa bahin sa Purok Masagana Barangay San Isidro.
Base sa testimonya sa usa ka babayeng witness nga upat ka buto sa wala masuta nga pusil ang iyang nadunggan og nakita ang pag-backing sa sakyanan sa biktima.
Human sa panghitabo gilayong milahos sa San Isidro Police Station ang insidente apan sirado hinungdan nga mipadulong sa Lagao Police Station aron magpablotter.
Sa gihimong imbestigasyon, nasuta sa rekord sa kapulisan nga ang biktima may standing warrant of arrest sa pagsupak sa National Building Code of the Philippines kon RA 6541 nga may piyansa nga P12,000 .
Ang kaso gipasaka kaniadtong Mayo 25 og ang awarrant of arrest ang gi-isyu ni Presiding Judge Elen Quinto sa National Capital Judicial Region Branch 65 Makati City.
Kahibaluan nga narekober sa crime scene ang upat ka basiyo sa .45 caliber pistols.
Kahibaluan nga kini na ang ikaduhang shooting incident nga nahitabo sa siyudad, sulod lamang karong semana.
Sa miaging adlaw, patay ang usa ka tricycle driver human gipusil usab sa motorcycle riding suspect sa bahin sa Barangay Calumpang kung asa blangko pa ang kapulisan sa motibo sa insidente.
