GENERAL SANTOS CITY – Duha ang patay, tulo ang samaron sa pagpamusil nga nahitabo sa Mansanitas Street, Brgy. Dadiangas South ning dakbayan sa Heneral Santos.
Base sa nakuhang impormasyon sa Bombo Radyo, ang mga namatay giila sa pangalan nga silang Harry Gumboc 19 anyos, usa ka altar server nga taga Brgy. Bula human nga naigo sa ulo nga bahin og Generous Ortolaso 24 anyos, usa ka OFW nga taga Silway Fatima ning dakbayan.
Ang mga samaron mao silang Janjan Bernabe, traysikel driver kung asa may daplis lang nga naangkon, og ang duha ka mga kauban sa napatay nga biktima nga padayon pang giila sa kapulisan.
Sa inisyal nga imbestigasyon, gibutyag ni Master Sergeant Famunag, investigator sa Bula Police Station, lima tanan ang sakay sa traysikel dihang natigayon ang pagpamusil pasado na matud pa alas otso kagabie.
Samtang sa pamahayag sa iyang igsuon, ang biktima nga si Ortolaso ang adunay duha ka mga anak og gikatakdang mularga unta sa abroad karong May 5.
Nasayran nga ang diver sa traysikel nga si Bernabe ang mao pay nakaadto sa Bula Police Station aaron ireport ang natigayong pagpamusil.
Blangko pa ang kapulisan sa motibo sa pagpamusil og ilhanan sa mga suspek tungod nagpadayon pa ang pagpangalap og impormasyon sa krimen.
Hinuon, gikabutyag nga ang mga suspek ang sakay sa motorsiklo paingon sa P. Acharon Boulevard ning dakbayan.
