GENERAL SANTOS CITY – Luyo nga nadawat na sa pamilya Dargantes ang pagkamatay ni Alexcel apan namahayag ang amahan nga si Alex nga dili mawala sa ilang pagduda nga may foul play ang pagkamatay sa anak.
Matud niini nga kung may mutabang lamang kanila andam nga itugyan ang patay nga lawas sa anak aron mahiling pinaagi sa autopsy aron makumpirma ang nahitabo.
Gikadugang pa niini nga mas maayo nga may konkreto nga basihan ang pagkamatay sa anak.
Pagsaysay pa sa amahan nga iyang gitawagan ang anak dihang nagpost nga nagpunay na lamang ug hilak human matud pa gibiyaan sa hinigugma.
Naestorya matud pa niini ang anak apan gibutyag nga nabalaka tungod nahibaw-an sa mga ginikanan nga naa kang Alexil ang hinigugma nga plano niini ibalik sa ginikanan.
Nadugangan pa ang pagduda dihang gipugngan sa pamilya sa hinigugma sa iyang anak ang cellphone niini luyo nga iya na kining na estorya nga ipadala ang tanan nga gamit sa iyang anak.
Nasayran tuig 2013 pa mipahawa sa dakbayan ang anak ug nagtraining ug boxing sa Baguio human gikuha sa RP team.
Gani may boxing record si Alexcel nga 22 wins 1 loss record.
Base sa talaan sa kapulisan sa Baguio nga naghikog si Dargantes Pebrero 13, 2021.
