GENERAL SANTOS CITY – Mukabat sa 3,404 ka kilo sa processed meats ang nakumpiska sa City Veterinary Office sukad gikan Enero hangtud Oktobre 15, 2020 sa nagpadayong kampanya kontra sa African Swine Fever (ASF).
Matud pa kang Dr. Antonio Marin, labaw sa City Veterinary Office nga gawas sa mga processed meats mukabat usab sa 153 ka kilos sa karneng baboy ang ilang nakumpiska.
Gikadugang pa ni Dr. Marin nga 45 ka buhing baboy ang wala na gitugtan nga makasulod sa GenSan.
Gibutyag pa sa nasampit nga opisyal nga wala gitanggal ang lima ka mga checkpoints nga gimuntar sa entry og exit points.
Bisag may pandemnya wala nila gipaubos ang alerto aron dili makasulod sa syudad ang virus .
Kahibaluan nga daghan sa gikumpiska sa CityVet nga processed meats ang gikan sa Davao Region nga sa maong dapit nagsugod ang pagkatap sa ASF sa Mindanao.
Ang ubang tag-iya sa processed meats nga pangkonsumo ang ilang karga apan nasuta nga ibaligya sa syudad.
Gihingusgan sa nasampit nga opisyal nga paspas ang pagkatag sa ASF virus gumikan sa mga processed meats.
