GENERAL SANTOS CITY – Nanawagan s PNP 12 Regional Director PBrig. Gen. Michael John Dubria sa mga saksi nga mugawas og tabangan ang kapulisan sa imbestigasyon kalabot sa pagkawala ni Patrolwoman Kristine Joy Rojas sa nakalabay nga tuig kung asa migawas ang konstrobersiya kalabot sa Pulis Paluwagan Movement kon PNP.
Matud pa ni Dubria, siya bag-o pa lang sa lugar apan daghan og nadawat nga impormasyon kalabut sa maong panghitabo.
Gibutyag niini nga sa paglingkod niya isip Regional Director, natapos na ang isyu sa PPM kung asa daghan ang mga nahimong biktima.
Apan giklaro nga sa karon wala pa siya’y ideya kung asa si Rojas gawas nalang nga kini nahimong missing pipila ka kaadlaw human mabulabog ang maong scam.
Dugang pa niini nga wala siya’y interest ug dili siya konektado sa unsa mang isyu sa PPM ug iyahang gipaniguro ang patas nga imbestigasyon kalabutan niini.
Gihingusgan usab ni Dubria nga walay bukog ug motor nga nakaplagan duol sa PRO-12 sukwahi sa pagtuo sa pamilya ni Patrolman Rojas.
