GENERAL SANTOS CITY – Dili pwedi nga mukuha ug pasahero sa dalan ang mga bus nga gabiyahe human gibalik sa modiefied general community quarantine (MGCQ) ang quarantine protocol sa dakbayan sa Heneral Santos.
Kini ang pagpaklaro ni Restituto Facurib ang Bulaong administrator dungan sa pagkumpirma nga mibalik na ang pagbiyahe sa Mindanao Star ug Yellow Bus line gikan sa dakbayan paingon sa Koronadal City, South Cotabato.
Matud ni Facurib nga point to point lamang ang gitugot sa special permit nga gipagawas sa Land Transportation Franchising Regulatory Board (LTFRB).
Usa kini sa kamandu-an nga gipatuman sa Inter Agency Task Force aron masiguro ang kahimtang sa mga pasahero.
Gikadugang ni Facurib nga sa terminal kinahanglan nga muagi sa thermal scanning ang matag indibidwal aron masiguro nga naa kini sa normal nga kahimtang.
Kinahanglan matud pa nga dili mulampas sa 37 degrees ang temperatura sa pasahero nga tugutan nga makasaka sa bus.
Mandatory usab nga maglista sa pangalan ang matag pasahero samtang sul-ob ang facemask, face shield nga miagi sa hugot nga rekosito.
Dili makakuha ug psahero sa terminal ang sakyanan nga walay ipresenta nga special permit gikan sa LTFRB.
