GENERAL SANTOS CITY – Laing nalambigit sa ilegal nga droga ang napusilan patay sa gipahigayong buybust operation sa hiniusang pwersa sa mga otoridad.
Ang target ang giila ni P/Lt. Col. Alex Joe Orgajada, chief of police sa Polomolok PNP nga si Rolando Compacion alyas Lando, 44 years old, minyo, school guard nga residente sa Purok 2, Brgy Rubber, Polomolok, South Cotabato.
Nakamatikod si Compacion nga pulis ang iyang ka-transakyon hinungdan nga mibunot og pusil sa hawak nga bahin nga gipunting sa mga operatiba.
Apan naunhan sa mga otoridad nga hinungdan nga nakaangkon og samad sa lawas.
Gidala ang nasampit sa Polomolok Municipal Hospital apan gideklarang dead on arrival.
Nakuha gikan sa posisyon sa suspek ang usa ka sachet sa shabu, P500 nga mark money og pistola.
Ang kapulisan ang hugot nga gaimbestiga kung asa gakuha og ilegal nga droga ang nasampit og kinsa ang iyang mga gibaligyaan.
