GENERAL SANTOS CITY – Gina-imbestigahan na sa kapulisan ang background sa duha ka bigtime drug suspects nga pulos taga Cotabato City nga napatay sa lain-laing lugar sa dakbayan samtang ginasusi kung kinsa ang tagsa nila ka supplier sa iligal nga droga.
Sa unang operasyon sa 1st Landfill Brgy. Sinawal, napatay human misukol sa operating team ang nagpangalan og Alias Mohamad.
Human matunol sa nasampit sa nagpakaaron-ingnon nga poseur buyer ang droga diha pa niini namatikdan nga pulis ang gibaligyaan.
Misulay sa pag-ikyas ang suspek gamit ang motorsiklo samtang nagapabuto sa mga pulis hinungdan nga gipabuthan igo sa iyang kalawasan.
Narekober gikan sa posisyon ni Alis Mohamad ang pusil, sling bag og motorsiklo. Sa follow-up operation nga gipahigayon sa kapulisan sa Prk. Udagre Brgy. Conel ning dakbayan, napatay usab ang suspek nga si Alias Salidpla dihang misukol sa mga otoridad.
Nakigpinusilay ang nasampit human nakamatikod nga pulis ang katransakyon sa pagbaligya og droga.
Dihang midagan aron muikyas napusilan kini sa operatiba hinungdan sa iyang kamatayon.
Namonitor sa otoridad ang kalihokan sa duha ka suspek nga bisan sa mga gipatumang protocols kontra COVID 19 gapamaligya gihapon og iligal nga droga.
