GENERAL SANTOS CITY – Miabut na kagabii sa Purok 4 Palkan Polomolok South Cotabato ang patay nga lawas ni Private John Agustin ang usa sa mga sundalo nga biktima sa pagbusikad sa duha ka IED didto sa Jolo, Sulu.
Gikan sa Jolo gihatagan ug miltary honor ang mga namatay nga sundalo una gisakay sa C130 cargo plane ug pagkahuman gidiretso sa punerarya ug dayon gidala sa tagsa nila ka destinasyon.
Kahinumduman nga killed-in-action sa panghitabo silang SSgt. Loui Quarteros, SSgt. Manuelito Oria, Private Omair Muksan, Pvt. James Apolinario, Pvt. Jhon Rey Paler ug Pvt. Juvenjay Emlani nga pulos sakop sa 12th Infantry Battalion Philippine Army.
Kahinumduman nga 15 ang namatay sa twin blasts samtang dul-an 80 usab ang naangol nga mga sundalo, pulis ug mga sibilyan nga hinimu-an sa duha ka babaye nga suicide bomber.
