GENERAL SANTOS CITY– Dead on the spot ang usa ka lalaki nga gikan sa korte og mitambong sa hearing sa iyang kaso human nga gipusil sa riding in tandem suspects sa Brgy. Apopong ning syudad.
Pasado alas 4:00 kagahapon sa hapon, dihang gipusil sa wala mailhi nga mga suspects si Niño Abalos, 41 anyos nga residente sa Tacurong Sultan Kudarat.
Sa pakighinabi sa Bombo Radyo sa igsuon nga si Marilyn Gubalani, kuyog sila nga tulo ka manag-suon sa pag-adto sa korte og giubanan si Abalos sa pagtambong sa hearing gumikan sa kasong giatubang sa kalapasan sa Sec 11 (illegal possession of dangerous drugs) sa RA 9165.
Mihunong sila pag-abot sa may New Society Highway og dayun unang minaug ang biktima sa sakyanan apan kalit nga adunay miduol nga duha ka wala mailhi nga mga lalaki nga sakay sa tagsa ka motorsiklo og gipusil sa ulo ang biktima.
Padayon ang kapulisan sa pagpangalap og dugang impormasyon aron mailhan ang mga suspek og masayran ang motibo sa pagpusil sa biktima.
Matud pa ni PMajor Ananias Vasquez, hepe sa Makar Police Station, kanhi nang napriso ang biktima kaniadtong 2017 gumikan sa kaso sa iligal nga droga.
Narekober sa crime scene ang mga basyo sa .45 calibre pistol samtang adunay nakuha ang otoridad nga kapin P10,000 og mga importanteng dokumento gikan sa biktima.
