GENERAL SANTOS CITY – Kalabutan sa trabaho ang gitan-aw nga unang motibo karon sa kapulisan sa nahitabong pagpamusil sa miaging adlaw sa Crossing Century Tambler, Gensan.
Giila ang biktima nga si Gerald Haben, hamtong ang pangidaron, admin guard sa usa ka shipping company sa Bawing ning syudad.
Base sa pahayag ni /PMaj. Richard Ybañez, hepe sa Tambler PNP, posibleng adunay personal nga kasuko ang suspek ngadto sa biktima.
Sumala pa nga isip usa ka admin guard aduna na matud pa’y mga trabahante ang natanggal sa trabaho tungod sa iyang hugot nga pagmonitor sa ilang mga lihok.
Kahinumduman nga sakay ang biktima sa usa ka 10 wheeler truck padulong sa direksyon sa Calumpang.
Sa dihang ni-minor ang gisakyang truck, adunay kalit mipatimaw nga duha ka wala mailhing lalaki sakay sa usa ka Mio Motor nga kulay yellow ug niduol ang gunman ngadto sa biktima.
Sa walay pag duha-duha gipabuthan kini ug pusil makapila ka higayon.
Nakaangkon ug daghang samad pinusilan ang biktima hinungdan sa iyang hinanaling kamatayon.
Mas gipalawman pa sa kapulisan ang imbestigasyon bahin sa labing ulahing pagpamusil sa Gensan alang posibleng ilahan sa mga suspek.
