Wala tugoti sa International Criminal Court kon ICC ang hangyo nga mogamit og pinulongang Tagalog sa opening statement sa pagsugod sa pagtaral sa kasong ‘crimes against humanity’ nga giatubang ni kanhi Presidente Rodrigo Roa Duterte.
Sa ikalimang status conference, mihangyo si Paolina Massidda, Principal Counsel sa Office of Public Counsel for Victims, nga tugotan ang paggamit sa Tagalog sa pagpaambit sa pipila ka mga salaysay sa mga biktima aron mas dali masabtan sa mga Pilipinong mosubaybay sa pagtaral ang ilang mga kasinatian.
Apan mipatigbabaw si Presiding Judge Joanna Korner nga kinahanglan magpabiling ‘English’ ang gamiton nga pinulongan subay sa mga balaod sa korte. Gipasabot usab niya nga mahimong mogamit og interpretasyon ug adunay hubad sa mga ‘transcript’.
Samtang, gitakda sa Trial Chamber III ang iskedyul sa pagtaral nga adunay tagsa-tagsa ka usa ka oras nga hearing, nga sundan og 30 minutes nga pahulay, base sa kasabotan sa prosekusyon ug depensa.
Gilauman nga magsugod ang aktuwal nga pagtaral sa Nobyembre 30, 2026.
