GENERAL SANTOS CITY – Gimando ni Police Regional Office(PRO)12 Director Brig. Gen. Michael John Dubria nga palawman ang imbestigasyon sa natigayong pagpamusil sa Purok Malipayon, Brgy. Poblacion, Esperanza, Sultan Kudarat kagahapon nga gikamatay sa usa ka pulis og tulo angol.
Giila ang namatay nga pulis nga si PEMS Arnold Paclibar nga naka-assign sa Esperanza Municipal Police Station og nagbantay sa quarantine checkpoint samtang ang mga angol silang PSSg Chato Maycong, Ms. Josephine Danggan, usa ka Barangay health worker(BHW) og Mr. Saldo alyas Lanto nga usa ka Barangay Tanod sa Barangay Poblacion.
Matud pa ni PLt. Lino Capellan, tigpamaba sa PRO12, nahimong direktiba ni Gen. Dubria sa Esperanza Municipal Police Station nga padayon ang pag-ila sa suspek nga nakasibat.
Sa iyang pamahayag, nakig-alayon ang kapulisan sa kasundalohan sa gipahigayong pursuit operation batok sa suspek
Nasayran nga samtang nagbantay sa checkpoint, gipahunong ni Paclibar ang usa ka lalake nga nakamotorsiklo og gipangitaan og mga dokumento apan samtang gisusi sa pulis ang gihatag niining dokumento kalit na lamang mibunot og cal 45 nga pusil ang suspek og gipusil sa ulo ang biktima.
Nakigpusilay pa si PSSg Maycong sa suspek apan naigo kini sa kamot.
Lakip sa mga gipusil ang BHW og BPAT nga nakaduty sa maong quarantine checkpoint niadtong tungura.
