GENERAL SANTOS CITY – Padayon pa ang assessment sa mga otoridad sa damyos nga hinungdan sa pag-agi sa buhawi sa pipila ka barangay sa dakbayan.
Bandang ala-una sa kaadlawon dihang nagmaut ang panahon, mikusog ang hangin, mikidlat og miulan.
Sa paglibot-suroy sa Bombo Patrol, nagkatag sa J Catholico Avenue Brgy. Lagao at pipila ka kalsada sa Brgy. Bula ang naputol nga mga sanga og natumba ang pipila ka punuan sa kahoy.
Pipila ka residente ang nagsumbong nga gilupad og buhawi ang atop sa ilang balay.
Nawad-an usab og suplay sa kuryente sa nasampit nga mga lugar human matumba ang poste.
Sa pakighinabi sa Bombo Radyo GenSan kang Brgy. Captain Nicanora Vargas sa Bula, GenSan kapin sa 30 ka mga balay og karinderya ang naguba.
Kasagaran sa mga balay nga naigo sa buhawi ang mga anaa daplin sa dagat sa Brgy. Bula.
Dugang niini, nangatuklap usab ang mga atop sa gymnasium sa Santo Nino de Bula Parish Church.
Samtang, may nareport sa mga kotse nga nadat-ugan sa natumba nga mga kahoy.
