GENERAL SANTOS CITY – Lain nga drug den ang nabungkag sa mga otoridad og unom katawo nga gagamitan og iligal nga droga ang nasikop sa operasyon nga gipahigayon sa Yu Village, Barangay Apopong.
Matud pa ni Naravy Duquiatan, labaw sa Philippine Drug Enforcement Agency (PDEA) 12, nadiskubre ang drug den atol sa entrapment operation nga gipahigayon sa giarkilahan nga balay sa lugar kung asa target ang nagpangalan og Rey Ortiz alias “Mata”, 59 anyos, usa ka high-value target drug personality.
Pipila ka bulan nang gipanid-an ang suspek nga anaa sa targetlist sa PDEA tungod sa kalambigitan sa illegal activities. Naabtan sa otoridad sulod sa drug den ang nagpangalan og Michael Ritch Caballes, 28; Danilo Guinto, 55; Mariel Fernandez, 20; Kent George Tablac, 33; og Kevin Tablac, 38.
Ang mag-igsuong Tablac ang nanag-iya sa girentahan nga balay ni Ortiz nga gihimong drug den. Narekober sa lugar ang 2 ka sachets sa suspected shabu may gibug-aton nga 15 gramos adunay estimated street value nga P102,000; lain-laing drug paraphernalia; empty plastic sachets nga nasulod sa pencil case og cash deposit slip kantidad og P104,000.
Kasong pagsupak sa Republic Act 9165 o Comprehensive Dangerous Drugs Act of 2002 ang atubangon sa mga suspek.
