GENERAL SANTOS CITY – Upat ka sitio sa Barangay Upper Suyan sa Malapatan ang target mahatagan ug bakuna sa mga health personnel gikan sa Municipal Health Office.
Kini human gikataho ang pagkamatay matud pa sa unom ka mga bata sa Sitio Maybaka, Sitio Kakub, Sitio Mahayag ug Sitio Matlosi sa Barangay Upper Suyan , Malapatan human nakasinate ug pagpangatol ug diarrhea.
Matud ni 1Lt. Jessie Hinampas sa Civil Military Office sa 73rd Infantry Battalion nga nagpatabang ang MHO Malapatan sa Philippine Airforce aron mahatud sa lugar ang mga personahe nga maghatag ug bakuna ug tambal .
Apan wala matud pa gitugtan ang paglupad sa chopper tungod naga ulan niining panahuna nga delikado alang sa paglupad sa air ambulance.
Tungod niini naglakaw na lamang ang mga helath personnel nga mutunga sa lugar dala ang tambal ug mga bakuna.
Gumikan matud pa sa kalayo sa lugar duha ka adlaw nga magbaktas ang mga nahisgutan kuyog sa mga sakop sa 73rd Infantry Batallion nga muhatag sa seguredad sa mga nahisgutan.
