GENERAL SANTOS CITY – Mukabat sa P300,000 ang damyos sa sunog nga natigayon sa Brgy Fatima ning syudad kung asa naugdaw ang usa ka panimalay.
Matud pa ni SFO3 Allan Rey Emperio, imbestigador sa Bureau of Fire Protection Gensan, padayon pa nilang ginasuta kung unsa ang hinungdan sa pagkasunog sa balay sa nagpangalan ug Guillermo Enriquez. Gibutyag ni Imperio nga nadala sa tambalanan ang igsuon niini nga si Maria Aida Enriquez 81 anyos human nga nakaangkon ug third degree burn.
Wala dayon matud pa makagawas ang nasampit dihang nasunog ang balay. Sa pamahayag ni Imperio nga dako na ang kalayo dihang nangabut ang kabomberuhan sa syudad human nakadawat ug tawag gikan sa mga residente sa lugar.
Nasayran nga ang maong sunog ang labing una nga structural fire nga girespondihan sa BFP GenSan ning bulan sa Marso, ang Fire Prevention Month luyo nga may narespondihan nga grassfire.
