GENERAL SANTOS CITY – Nagpadangat og lain-laing reaksyon sa social media ang mga nahimong miyembro sa Alabel-Maasim Credit Cooperative o ALAMCCO human nga nagpagawas ug warrant of arrest ang korte batok sa mga opisyal niini.
May pipila nga nasubo sa pwedeng dangatan sa 18 katao nga apil sa warrant of arrest apan mas daghan ang nangasuko og gikanayong ‘ karma’ na ang nahitabo sa mga nasampit.
Ang pipila nanawagan kang Pastor Jerson Cagang og sa uban pang opisyal sa ALAMCCO nga mugawas gikan sa ilang gitaguan aron atubangon ang kaso og mauli ang kuwarta sa mga investors.
Una niini, gimando sa Regional Trial Court 11th Judicial Region Branch 46 ang pag-aresto sa mga opisyal sa ALAMCCO tungod sa kasong syndicated estafa.
Mikabat sa 18 personahe ang gipagawasan ug warrant of arrest nga silang Jerson Cagang, Conrado Mancao, Tirso Cereno, Juanito Jhon Castillo, Benigno Cereno, Albert Cagang, Fe Cagang, Ailene Mancao, Roshine Cereno, Jason Baybay, Liezel Vilan, Ivy Caparos, Calixto Bana-ay, Marlyn Tulio, Diana Ferry Sope, Anni JOy Dela Cruz, Marlon Marvin L Im ug Eustaquio Hocson.
Nasayran nga ang nasampit nga mga indibidwal nga mga opisyal ug board of directors sa ALAMCCO , nagtanyag og 35% nga pay-out sa mga myembro.
Apan human nga napasirado ang KAPA ug ubang investment schemes, wala na nakahatag ug payout ang ALAMCCO sa ilang mga miembro nga mikabat sa milyon-milyon ka pesos.
Padayon usab ang gisaad sa mga opisyal sa ALAMCCO nga ibalik nila ang kwarta sa mga investors apan hangtud karon wala matuman.
