GENERAL SANTOS CITY – Suyuron sa mga bakunador ang tulo ka barangay ning dakbayan karong adlawa alang sa nagpadayon nga kampanya kontra sa sakit nga polio.
Matud pa ni Dr. Jett Oco sa City Health Office, subling balikan ang Brgy. Calumpang, City Heights og Apopong aron magpahigayon og house to house vaccination tungod base sa record adunay ubos nga ihap sa mga bata nga nabakunahan.
Nasayran nga sa Calumpang og City Heights mukabat lang sa 83 % ang mga bata nga nga Zero hangtod singko anyos paubos ang edad ang nabakunahan samtang 90% lamang sa Apopong.
Gibutyag ni Dr. Oco, dili pwedeng may bata nga dili mabakunahan kung diin basi sa direktiba sa mayor nga angayang may aktibong kooperasyon ang mga barangay captains aron makab-ot ang target nga 100% ang mabakunahan.
Kagahapon, subli usab nga gibalikan sa mga bakunador ang barangay Bula og San Isidro.
Sa gipadalang mensahe ni Dr. Oco sa Bombo Radyo, mukabat na sa 70,152 ka bata kon 94 % ang nabakunahan kontro polio.
Nasayran nga hangtud lang unta December 7 ang Polio Drive apan gilugwayan hangtud December 13.
