GENERAL SANTOS CITY —–Paspas nga misibat ang tag-iya sa mga ginabas nga kahoy human mamatikdan ang pag-abut sa mga hiniusang pwersa sa kapulisan ug kasundaluhan.
Gibana-banaang mukabat sa P16,000 ang kantidad sa ginabas nga kahoy ang gibilin sa wala maila nga Illegal logger sa Sitio Takal, Barangay Pinol, Maitum Sarangani.
Matud ni Police Major Rodel Javison, hepe sa Maitum PNP nga nakadawat ug impormasyon kalabutan sa pundok sa ginabas sa kahoy nga andam nga ipagawas sa lugar.
Dali nga nakig-alayon si Javison sa mga sakop sa 27th Infantry Battalion sa Maitum ug girespondihan ang lugar apan kamada sa ginabas kahoy lamang ang ilang naabtan.
Nagduda ang opisyal nga ikarga kini agi sa dagat apan ilang naunahan hinungdan nga gibiyaan.
Human makuha ang mga illegal lumber gilayon usab nga gitugyan sa Municipal Environment and Natural Resources Office (MENRO).
