GENERAL SANTOS CITY – Mukabat sa 35 ka mga miyembro sa New Peoples Army kon NPA ang mitahan sa gobyerno sulod lamang sa unang lima ka bulan ning tuiga.
Ug gani, kagahapong adlawa, gipresenta sa Police Regional Office 12 kon PRO-12 ang 28 kanila atul sa pagbisita ni PNP Chief P/Gen. Oscar Albayalde, sa PNP 12 Headquarters sa Brgy Tambler ning siyudad.
Lakip nga gipresenta ang mga armas ug ekplosibo nga gi-surrender sa mga nahisgutang rebel returnees.
Kahibaluan nga lima sa naasoy’ng ihap ang mitahan sa Kiamba, Sarangani Province kaniadtong May 8, 2019, ilawom sa Platoon Samsung Guerilla Front 73, kung asa dala nila ang upat ka long firearms, ug usa ka short firearm.
Samtang 15 usab ang gikan sa Lebak, Sultan Kudarat sa Platoon Cherry Mobile Guerilla Front 73, dala ang unom ka long firearms ug duha ka short firearms, ug siyam ka rebelde usab gikan sa susamang platoon sa Senator Ninoy Aquino, Sultan Kudarat, dala ang pito ka short ug long firearms.
Sa karon ginaproseso na ang mga dokumento sa mga nahisgutang rebelde alang sa pagpailawom kanila sa Enhance Comprehensive Local Integration Program kon ECLIP nga programa sa gobyerno alang sa mga nahisgutang rebelde.
