GENERAL SANTOS CITY – Nagpagawas ug advisory ang Department of Interior and Local Government kon DILG aron manduan ang mga lokal nga panggamhanan (LGU), Philippine National Police (PNP) ug National Bureau of Investigation (NBI), aron ipatuman na ang gipagawas nga Cease and Desist Order kon CDO sa Securities and Exhange Commission kon SEC batok sa
Kabus Padatuon kon KAPA Community Ministry International Inc.
Base kini sa gipagawas nga advisory sa DILG nga may petsa nga Mayo 2, 2019, nga pirmado ni DILG Sec. Eduardo Año.
Gipahinungod kini sa tanang mga regional director ug field offices sa DILG, apil na sa mga LGUs ug PNP.
Kahinumduman nga Pebrero 14 ning tuiga dihang nag-isyu ang SEC En Banc sa naasoy’ng CDO batok sa KAPA, aron manduan kini apil ang mga tawo nga nagpaluyo ug nanguna sa maong investment scam sa pagpanguna ni Joel Apolinario, ang founder sa KAPA aron undangon na ang operasyon niini hilabi na ang pagdawat ug investment, apil na ang pagpromotar sa ilang mga gimbuhaton.
Hinungdan nga gipaabot na lamang sa publiko ang mamahimong aksyon ug lakang nga himuon sa mga hingtungdang ahensya ug buhatan kalabot sa naasoy’ng DILG advisory.
