GENERAL SANTOS CITY – Ginahulat pa sa National Bureau of Investigation kon NBI-Sarangani District Office (SARDO), nga mahuptan ang labing ulahing advisory gikan sa Securities and Exchange Commission kon SEC may kalabutan sa pag-revoke kon pagbakwi sa certificate of corporate registration sa Kabus Padatuon kon KAPA Community Ministry International Inc.
Kini alang sa gilaumang lakang nga ilang pagahimuon, hilabi na nga padayon gihapon sa pag-operate ang naasoy’ng investment scam luyo sa gipagawas nga Cease and Desist Order kon CDO sa komisyon, nga gideklara usab nga permanente na.
Kahibaluan nga sa pakighinabi sa Bombo Radyo GenSan kang Regner Pineza, labaw sa NBI-Sardo, gibutyag niini nga wala pa nahuptan ang labing ulahing advisory ug desisyon sa Commission En Banc sa petisyon sa SEC Enforcement and Investor Protection Department, hinungdan nga dili pa masulti ang sunod nga lakang nga pagahimuon.
Kahibaluan nga ang NBI lakip sa gi-deputize kauban sa lokal nga panggamhanan ug kapulisan, nga mu-assist sa SEC sa pagpatuman sa CDO batok sa KAPA.
Ug gani, sa South Cotabato, mipasalig na ang South Cotabato Police Provincial Office nga ipatuman na ang CDO batok sa KAPA sa ilang area of responsibility.
