GENERAL SANTOS CITY – Gipagawas sa buhatan ni Mayor Ronnel Rivera ang GSC Tactical Operation Center Hotline, nga pwedeng katawgan sa katawhan, kon ugaling may mga mamatikdan nga mga kadudahan nga butang o tawo.
Nanawagan ang lokal nga panggamhanan ning dakbayan sa GenSan ngadto sa publiko nga magbinantayon gayud sa palibot.
Kini human sa ikaduhang insidente sa pagpabusikad sa Isulan, Sultan Kudarat.
Matud ni City administrator Atty. Arnel Zapatos, mukabat na sa 1,000 ka mga pulis, militar ang magbantay sa palibot lakip na ang mga force multipliers.
Apan nanawagan kini sa publiko tungod dili kaya sa mga otoridad ang pagbantay sa palibot kung wala ang kooperasyon sa publiko.
Dili usab matud pa angayang magpataka sa pagpost sa social media ug mga impormasyon nga walay beripikasyon nga makamugna lamang ug dugang kahadlok sa publiko.
Ug kung may mga mensahe nga ipadangat sa mga otoridad, mahimo matud pang mutawag sa tactical operation hotline, nga 09277667822 o kaha 09985987207.
Pwede usab sa hotline sa CDRRMC nga 09255513215.
