Liboan ka mga estudyante sa Indonesia ang nagpahigayon og dinagkong protesta tungod sa ilang pagkadismaya sa pag-atubang sa gobyerno sa nagkagrabeng ‘haze’ nga mikaylap sa nasud ug sa Southeast Asia niining milabay nga mga semana.
Kagahapon, Biyernes, kapin sa 500 ka mga estudyante ang miapil sa protesta sa gawas sa Central Kalimantan Governor’s Office sa kapital nga siyudad sa Palangka Raya, dala ang ilang mga panawagan alang sa solusyon sa nagkagrabeng ‘haze’ nga nagsugod pa niadtong Agosto.
Gipanawagan usab sa pipila ka mga nagprotesta si Indonesian President Prabowo Subianto nga magdeklara og ‘national emergency’ ug mohimo og mas epektibong mga lakang aron mapugngan ang mga pamaagi sa agrikultura nga giila nga usa sa mga hinungdan sa mga sunog sa kalasangan.
Ang maong haze resulta sa mga sunog sa kalasangan nga mikaylap sa nagkadaiyang bahin sa nasud, lakip na sa isla sa Borneo diin daghang insidente sa sunog ang natala.
Kasagarang magsugod ang mga sunog sa kalasangan sa Indonesia panahon sa ting-init ug ting-uga, sugod sa bulan sa Abril. Apan, natala karong tuiga ang pinakagrabeng insidente sa sunog sa milabay nga dekada.
Tungod niini, nahimong hulga sa panglawas sa publiko ang ‘haze’ nga gipahinabo sa mga sunog. Sumala sa Ministry of Health sa Indonesia, kapin sa 333,470 ka residente sa pito ka probinsya sa nasud ang natala nga nag-antos sa ‘acute respiratory illnesses’.
Dakong epekto usab ang naangkon sa ‘haze’ sa kalidad sa hangin sa mga silingang nasud sama sa Singapore, Malaysia ug uban pang mga nasud sa Southeast Asia
