GENERAL SANTOS CITY – Plano ni Sen. Manny Pacquiao nga paimbestigahan karon ang KAPA.
Kini aron patubagon ug masilutan kon mapamatud-an nga nakasupak sa balaod, human nasayran ang ginahimong pagpangilad, pinaagi sa pagdawat ug investment gikan sa mga miyembro apan donasyon ang nakalatid sa gipirmahan nga dokumento.
Ug gani, sa pakighinabi sa Bombo Radyo, nagpahimangno ang senador sa katawhan nga dili magpailad sa nahisgutang investment scam.
Matud pa nga sa iyang nasayran, ginabinuangan sa KAPA ang katawhan, hilabi na kadtong mga kabus.
Sumala pa nga siya mismo ug ang ilang pamilya ang makapila ka higayon nang nabiktima sa mga susamang scam nga dagko kunuhay ug interes apan maayo lang sa una ug kadugayan kon gamay na lang ang mu-invest, anam-anam nang mawala ug daghan ang mailad, tungod gakita lamang gikan sa mga ma-recruit nga mag-invest.
Gumikan niini, gitambagan ni Sen. Pacquiao ang katawhan hilabi na ang mga taga-Sarangani nga dili gayud magpailad sa KAPA.
Samtang, Hugtanong gitawag ni Mayor Librado Navarro sa Bislig City, Surigao del Sur, nga “garapalan sa pagpangilad” ang ginahimo sa nagpailang pastor ug matud pa “modern Moses” Joel Apolinario sa KAPA nga gigamit pa ang relihiyon ug ang Ginoo aron makaawhag ug makapangilad sa mga tawo.
Sa pakighinabi sa Bombo Radyo, gihingusgan ni Mayor Navarro nga scam gayud ang sistema sa KAPA nga gipagawas nga donasyon ang ginakolekta nga salapi sa ilang mga miyembro, apan may pasalig nga makadawat ug 30% matag bulan, nga tataw matud pa nga ginakuha lamang sa mga bag-ong ma-recruit.
Ug gani sa ilang lugar, sa iyang pagbanabana, kapin sa P40 milyon ang nakuha ni Apolinario sa iyang mga nailad, kung asa ang uban ang nagprenda ug mga yuta o kaha ang ilang retirement ang gibutang sa KAPPA.
Isip aksyon, gipatawag matud pa ni Mayor Navarro ang mga na-recruit nga miyembro nga sagad mga magtutudlo ug mga opisyal sa DepEd, aron pahimangnuan ug tambagan.
Ug bisan ug nakasuhan na si Apolinario, apan gumikan may kwarta na ug nakapiyansa ug nakaangkon ug mga abogado hinungdan nga nagpabiling gawasnon.
Gipanghimakak usab ni Mayor Navarro nga gi-personal ug giinitan niini si Apolinario nga una nang gikabutyag sa nasampit nga gumikan sa away sa pulitika.
Gihingusgan ni Mayor Navarro nga gumikan kini sa gihimong pagpangilad ni Apolinario sa katawhan sa ilang lugar.
Dungan niini, giawhag ni Mayor Navarro ang mga lokal nga opisyal sa GenSan ug Sarangani, nga muaksyon gilayon ug dili na maghulat ug reklamante, aron dili na makapangbiktima pa ug mas daghang katawhan ang KAPA.
Giawhag pa niini ang LGU-GenSan ug Sarangani apil ang kapulisan dinhi nga makig-alayon ngadto sa CARAGA Region, apil na sa ilang LGU sa Bislig, ug muhimo ug hiniusang lakang batok sa KAPA.
Kini gumikan delikado matud pa kon mukatag pa sa mas daghang lugar o sa tibuok Pilipinas ang modus sa KAPA, ug mas daghan pa gyud ang mailad.
