GENERAL SANTOS CITY – Gihingusgan sa usa sa mga sports analyst dinhi sa dakbayan nga kung kung muapil sa usa ka dakong torneyo, bisan sa unsa mang klase nga tournament angayang preparado.
Sa pakighinabi sa Bombo kang Fred Lumba, gibutyag niini nga sa iyang panglantaw, dili andam ang Gilas Pilipinas aron musabak sa Asian Games gumikan pipila ka semana lang ang ilang practice.
Sumala pa niini, ang ubang mga players ang dili kabisado sa dinulaan sa ilang mga kauban tungod dinalian ang pagpili sa mulangkob sa team ug wala kaayo masala pag-ayo.
Sa iyang pahayag , posible kining hinungdan nga malisdan ang Gilas og usa sa mga babag sa ilang kadaugan.
Gikadugang pa ni Lumba, ang usa sa mga dakong babag nga mudaog ang Gilas gumikan mga lig-ong team ang kalaban sa Pilipinas sama sa China, Kazakhstan og uban pa nga solido ang team og dugay na nga gipangandaman ang Asian Games.
Samtang gidayeg ni Lumba si Coach Yeng Guiao nga gidawat ang dakong hagit nga mahimong coach sa Gilas Pilipinas sa Asian Games.
