GENERAL SANTOS CITY – Padayong ang hugot nga kampanya sa kapulisan batok sa iligal nga sugal.
Ug gani, matud ni Police Chief Inspector Jovenson Bayona, tigpamaba sa General Santos City Police Office, mukabat na sa 231 ka operasyon batok sa iligal nga sugal partikular na ang last two, kung asa 128 ka tawo na ang naaresto, ug 121 ka kaso ang napasang-at ang kaso.
Samtang, may kalabutan sa kontrobersyal nga operasyon sa Small Town Lottery kon STL, giangkon ni Chief Inspector Bayona nga base sa gihuptan nila nga guidelines, may mga nakita sila nga mga bayolasyon.
Kahibaluan nga nga base sa IRR nga gipagawas ni Mayor Ronnel Rivera, anaa lamang sa 45 ka STL outlets ang angayang makit-an sa siyudad.
Apan base matud sa gihimong pag-inspeksyon sa kapulisan, kapin sa 200 ka mga outlets ang ilang nakita.
Ug gani, may mga outlet matud pa nga wala nalakip sa listahan sa lehitimo nga mga outlets, gawas pa sa ubang bayolasyon sama sa wala naka-uniporme o ID ang mga empleyado.
Una nang gikabutyag nga ang sobra sa gitakda nga ihap sa mga outlet, ang makonsiderang iligal.
Hinungdan nga gisugyot sa kapulisan nga magmugna ug team nga gilangkuban sa mga representante sa PCSO, LGU, ug kapulisan, aron makita kon kinsa ang mga lehitimo nga mga outlets ug mapa-undang ang mga iligal nga nag-operate.
