GENERAL SANTOS CITY – Subling giusa-usa ni Kag. Franklin Gacal ang mga bayolasyon sa Trento Gaming and Leisure Corporation sa operasyon sa STL sa syudad.
Atul kini sa iyang privilege speech kagahapong adlawa sa sesyon sa Sangguniang Panglungsod, kung asa subling nahisgutan ang kalabutan sa revocation o suspension sa operasyon sa STL sa dakbayan.
Sumala pa nga sa gipagawas nga IRR ni Mayor Ronnel Rivera, aduna lamang 45 ka mga STL outlets lang sa siyudad.
Apan sa iyang nasayran gikan sa mayor nga 185 ang STL outlets sa dakbayan, samtang base sa ilang source sa kapulisan, adunay dul-an 300 ka STL outlets.
Gawas niini, aduna usab matud pay mga STL outlets ang duol sa simbahan.
Nakadawat usab matud pa siya ug sulat gikan kang Imam Hadji Amir Idris nga nagkanayong adunay duol sa mosque sa Purok Palen Labangal, butang nga supak sa ilang pagtuo.
Gikwesyon usab ni Kagawad Gacal ang nadawat nga share sa syudad nga matud pa gitikasan ang dakbayan.
Gumikan niini, pipila sa mga kaubang konsehal nin Gacal ang nagkanayon nga hinabion nila si Mayor Rivera alang sa mamahimong sunod nga lakang.
