GENERAL SANTOS CITY – Mas gipahugtan pa ang seguridad sa Axiata Arena, alang sa matigayon nga Fight of Champions: Pacquiao vs Matthysse sa Dominggo, Hulyo 15.
Ug gani, kagahapon sa hapon, human sa media workout ni Sen. Manny Pacquiao, nagpahigayon ug ocular inspection sa tibuok arena ang security team sa Team Pacquiao.
Matud sa head security sa Pinoy ring icon nga si Edward Lura, giinspeksyon nila ang security sa tibuok arena, apil na ang mga entrance ugt exits niini.
Kahibaluan nga ang naasoy’ng venue ang may 16,000 capacity.
Sa karon, aduna matud pay 90 security personnel nga g-deploy sulod sa arena, gawas pa sa mga police outposts.
Samtang, sa gawas sa venue aduna matud pay nakabantay nga anaa sa 1,000 Malaysian police, aron masiguro ang seguridad sa tibuok lugar ug sa tanan nga mutan-aw sa away.
Kini hilabi na nga una nang nanggawas ang taho nga personal nga mutan-aw sa away si Pangulong Rodrigo Duterte kauban ang prime minister sa Malaysia.
Samtang, gihulagway sa assistant conditioning coach nga si Mermann Flores nga “good to go” ang Pambansang Kamao.
Ug gani, bisan karong taknaa, pwede na matud pang ipahigayon ang away gumikan sa ginapakita nga kaandam sa fighting senator.
