Sen. Pacquiao mitungtong na sa peak ang kondisyon – coach
GENERAL SANTOS CITY – Mitungtong na sa peak ang kondisyon ni eight division world champion ug Sen. Manny Pacquiao.
Kini ang gikumpirma sa Bombo Radyo ni Coach Buboy Fernandez.
Matud pa, ginapaningkamutan na lamang nila karon nga mamintina ang 80 percent nga kondisyon, hilabi pa nga kapin usa ka bulan pa una ang away.
Gikabutyag nga na-apply na nila sa training ang pipila sa ilang mga game plan, istratehiya ug plano sa pag-atake batok kang Lucas Matthysse.
Kahibaluan nga gilaumang mutungtong na sa 10 rounds ang sparring sessions sa fighting senator ning semanaha, hangtod nga maabot sa 12 rounds.
Nasayran nga hangtod sa Hulyo 9 pa magpabilin ang training camp sa Team Pacquiao dinhi sa dakbayan.
Gipasalig ni Fernandez nga gihimo nila ang tanan nga makaya alang sa pagbansay ni Pacquiao, aron mahimong kondisyon sa hingpit, una misaka sa ring sa Hulyo 15.
Dungan niini, subling miapela si Coach Buboy sa katawhan ug pag-ampo alang kang Pacquiao, alang sa kalampusan niini sa umaabot nga away.
