GENERAL SANTOS CITY -Nagmalampuson ang search warrant operation sa General Santos City Police Office sa pagpanguna ni OIC City PNP Director Sr/Supt. Raul Supiter sa usa ka bodega sa Prk. Kulasi Labangal nga gidalhan sa mga palusot nga sigarilyo gikan sa Indonesia.
Sumala pa ni PRO-12 Director P/C/Supt Marcelo Morales kinsa nagkuyog sa operasyon kagabi, gibutyag niini nga panag-iya sa usa ka Alias Toto Malik ang gisulod nga bodega apan wala kini maabtan sa kapulisan sa lugar.
Ang maong operasyon, follow-up operation sa GSCPO sa gipahigayong operasyon duha ka semana na ang nakalabay batuk sa tulo ka Indonesians nga nadakpan tungod sa pagpalusot og sigarilyo.
Human nga napasakaan ug kaso, nagbayad ug piyansa ang tulo ka langyaw hinungdan nga gibuhian.
Apan sa gipahigayong surveillance, namonitor sa kapulisan nga mibalik sa maong iligal nga gimbuhaton ang mga nasampit hinungdan nga nagpahigayon og operasyon og natultulan ang bodega nga gitambakan sa kahon-kahong sigarilyo.
Sa inventory sa Intelligence Detection Management Branch, mukabat sa 91 ka kahon sa “Gudang Baru” ang nakuha sa bodega ni Alias Toto Malik nga subject karon sa manhunt operation. Kustodiya na sa GSCPO ang mga naasoyng sigarilyo.
Una niini, mukabat sa 39 ka kahon sa palusot nga sigarilyo ang nakumpiska miaging gabii nilang Supiter gikan sa nagpangalan ug Ares Bentilo 26, residente sa Tinungkarin, Tabukan sa Indonesia.
Naabtan matud pa nilang Supiter ang nahisgutan sa usa sa tulo ka sakayan nga midunggo sa lower Makar samtang gakarga sa palusot nga sigarilyo.
