GENERAL SANTOS CITY – Padayon nga nakaapekto sa Mindanao ang low pressure area (LPA) nga gibantayan sa Pagasa nga anaa sa gawas sa Philippine Area of Responsibility (PAR).
Kini ang gibutyag ni Rene Punzalan, ang labaw sa PDRRMC sa Sarangani Province kung asa sumala sa nasampit nagresulta sa nasinatiang mga pag-ulan sa SoccSKsargen.
Tungod niini, anaa karon sa orange alert ang pahimangno sa Office of Civil Defense, NDRRMC og Pagasa.
Buot pasabot niini, gipahimangnuan ang mga residente sa mga lugar nga posibleng maapektuhan ilabina kadtong mga nagpuyo sa mga ubos nga bahin, kabaybayonan og tiilan sa bukid nga mangandam sa posibleng pagbaha, landslide o unsa mang kalamidad nga mahitabo.
Sumala pa ni Punzalan nga nakasinati og pagtutaligsik ang Sarangani Area o usahay pagkusog nga pag-ulan sukad pa kagahapon.
Nagpadala na sila og advisory sa mga munisipyo og mga barangaay nga i-activate ang ilang MDRRMC ug BDRRMC.
Labing gitutukan sa PDRRMC ang Buayan River kung adunay pag-ulan sa Sarangani tungod kung mag-overflow ang tubig, daghang mga kabalayan ang mabahaan.
