GENERAL SANTOS CITY – Nanawagan pinaagi sa Bombo Radyo si Police Senior Inspector Robert Fores, deputy station commander sa Makar Police Station, ngadto sa mga tagbalay nga dili gayud mudawat o musugot nga bilinan ug tolendoy o slot machine ang ilang mga panimalay.
Kini human sa pagkakumpiska nila ug laing usa na usab ka unit sa tolendoy sa Blk 2 Bulaong Extension, Brgy Labangal ning dakbayan miaging adlaw. Kahibaluan nga giaresto ang tag-iya sa panimalay nga si Lilia Macalawan, 60-anyos, ug kasamtangang balhug sa nasampit nga police station.
Karong adlawa siya gikatakdang kasuhan ug pagsupak sa Presidential Decree No. 1602 kon Illegal Gambling tungod sa nakumpiska nga tolendoy ug cash sa iyang panimalay.
Una niini, kahibaluan nga naabtan nilang Senior Inspector Fores kauban sa Bombo Radyo reporter atul sa gipahigayong raid, nga may gadula sa naasoy’ng slot machine.
Matud ni Fores, ang dakpon sa kapulisan mao ang tag-iya sa balay nga gibilinan sa tolendoy lakip ang maabtan nga nagdula, ug dili ang nagbilin nga sagad nga dili ma-timingan atul sa raid.
Ug mukabat sa P10,000 nga piyansa aron makaangkon ug temporaryong kagawasan.
Apan gihingusgan matud pa ni Macalawan nga igo lamang gibilin ang tolendoy sa iyang panimalay, ug may gakolekta lamang sa kita niini.
Sa karon, padayong ginaila sa kapulisan ang tawo nga nagbilin sa tolendoy sa nasampit nga panimalay.
