GENERAL SANTOS CITY – Shocked ug kasamtangan pang nakasinati ug trauma ang usa ka 17-anyos nga babae, sa iyang nadangatan human matud pa gilugos sa tulo ka lalaki, sa Brgy Tambler ning dakbayan.
Kini ang gibutyag ni P/S/Insp. Dominador Soliva, hepe sa Tambler Police Station, sa pakighinabi sa Bombo Radyo, human midangop sa ilang presinto ang biktima ug gipatala ang nahitabo kaniya.
Una niini, base matud pa sa pagsaysay sa biktima sa Women and Children’s Protection Desk, pasado alas-8:00 Martes sa gabii, Oktobre 17, samtang nag-inusara nga gabaktas kini pauli sa ilang balay gikan sa usa ka purok sa nasampit nga barangay, dihang gisundan sa mga supek nga sakay sa usa ka sikad.
Pag-abot sa mingaw nga lugar, gikarga matud pa siya sa sikad, ug gidala sa bakante nga lote kung asa siya gipuli-pulihan ug lugos.
Sa karon gibutyag ni Sr. Insp. Soliva nga gipaabot pa ang resulta sa gihimong medical examination sa biktima, aron masayran kon nalugusan gayud kini.
Samtang, blangko matud pa ang kapulisan kalabot sa ilhanan sa mga suspek, gumikan mismong ang biktima ang wala nakaila.
Hinungdan nga nanawagan si P/S/Insp. Soliva sa mga may kasayuran, o kaha nakasaksi sa panghitabo, nga makigtambayayong sa kapulisan aron matumbok ang mga suspek ug mapanubag sa ilang gihimo sa 17-anyos.
